Больш за 200 чалавек узялі ўдзел у адкрыцці юбілейнага акадэмічнага года “Універсітэту Залатога Веку”. Імпрэза адбылася 4 кастрычніка ў гарадскім доме культуры.

Сустрэча па традыцыі распачалася з выканання студэнцкага гімна “Гаўдэамус”.

Затым дырэктарка праграмы Лана Руднік прадставіла каманду праграмы – сваіх асістэнтак, сябраў Рады, а таксама выкладчыкаў УЗВ-10.

Нават з улікам таго, што не ўсе змаглі прыйсці на імпрэзу, на сцэну выйшла некалькі дзесяткаў чалавек!

З кранальным вершам і цёплымі пажаданнямі да ўдзельнікаў імпрэзы звярнуўся ганаровы студэнт УЗВ Іван Буднік.

Упрыгожваннем сустрэчы стаў канцэрт, падрыхтаваны артыстамі дзіцячай музычнай школы №2.

Выступае хор дзіцячай музычнай школы №2 пад кіраўніцтвам Ірыны Жыгулінай

У канцы сустрэчы студэнты атрымалі расклад заняткаў “Універсітэту Залатога Веку”, якія распачнуцца з 8 кастрычніка.

Студэнты УЗВ вывучаюць расклад заняткаў на першы семестр

Больш фотаздымкаў з адкрыцця УЗВ-10 глядзіце ў фотарэпартажы валанцёра з Польшчы Пшэмыслава Кучыньскага.

Праграма “Універсітэт Залатога Веку” была заснаваная ў красавіку 2010 г. сябрамі ГА “Цэнтр “Трэці сектар”.

З 2015 г. праграма рэалізуецца сумесна з установай “Цэнтр дадатковай адукацыі дарослых “Студыя карысных кампетэнцый“.

Мэтай “Універсітэту Залатога Веку” з’яўляецца паляпшэнне якасці жыцця сталых людзей праз іх інтэлектуальную, фізічную, сацыяльную актывізацыю, а таксама праз адстойванне іх інтарэсаў.